کور / راپور / چارواکي: له کندوز ښار څخه ئې طالبان پر شا کړي

چارواکي: له کندوز ښار څخه ئې طالبان پر شا کړي

افغان چارواکي وايي، چي لا هم د کندز ښار په څنډو کي د طالب وسلوالو سره جګړه روانه ده او له ځينو سيمو ئې طالبان پر شا کړي دي.

د چارواکو په خبره د ښار په مهمو برخو کي ئې ځانګړي ځواکونه ځای پر ځای کړي دي.

د کندز د امنيې قوماندانۍ ویاند سید سرور حسیني په دې اړه وايي: امنیتي ځواکونو د وسله والو طالبانو برید پرشا تمبولی او دغه راز د هوايي ځواکونو په برېد کي ۲۶ تنه وسله وال طالبان وژل سوي او افغان ځواکونه طالبانو ته دا اجازه نه ورکوي چې د تېرو کلونو تجربه بیاځل تکرار سي.

تېره شپه ۱:۳۰ بجې طالبانو د کندوز پر ښار د څلورو خواوو څخه حمله وکړه او د ښار ليري څنډو ته داخل سول.

د کندز د ښار جنوب لور ته د سه درک، غرب لورته د خاکنۍ، شمال لور ته د بالاحصار او ختیځ لور ته د چله مزار په سیمو کې د پولیسو ملي اردو او وسله والو طالبانو تر منځ ډزې تبادله کیږي.

طالبان ادعا کوي چي د ښار څنډو ته داخل سوي او مخ پر وړاندي روان دي، خو افغان حکومت وايي چي د ښار له څنډو ئې طالبان بېرته شړلي دي.

د تېري شپې په بريد کي طالبانو، افغان سرتېرو او ملکي وګړو ته مرګژوبله اوښتې ده او ځيني ټپيان روغتون ته انتقال سوي دي.

افغان چارواکي وايي، چې کندوز ښار ته ئې کومانډو ځواکونه استولي او اوس د طالبانو سره په جګړه بوخت دي.

بل خوا طالب وياند ذبيح الله مجاهد وايي، چي د کندز ښار له کابل بندر سره نژدې د خاک کني سیمه دوی نيولې ده.

پر کندوز د تېري شپې د بريد سره هممهال هلته مخابراتي شبکو کار پرې ايښی او د اړيکو نيولو لپاره سيسټمونه غير فعال دي.

 

تراوسه د مرګژوبلي په هکله دقيق مالومات نسته، خو افغان حکومت وايي چي طالبانو ته ئې مرګژوبله اړولې ده.

د کندوز روغتيايي مسؤولين وايي، چي روغتون ته د دوو افغان سرتېرو مړي او ۱۰ ژوبل ملکيان وروړل سوي دي.

په ۲۰۱۵ کال کي هم طالبانو پر کندوز ښار حمله وکړه او دغه ښار ئې د څو ورځو لپاره په کنټرول کي اخيستی وو چي بيا ناټو او افغان ځواکونو په ګډه د عملياتو په ترڅ کي طالبان له ښاره پر شا  کړل.