لراوبر ویب پاڼه لراوبر يو افغان – تازه خبرونه
د ترهګرو د مالي سرچينو د وچولو اداره (ايف اې ټي ايف) وايي، چي د راروان کال فبروروي مياشتي پوري به پاکستان په خړ ليست کي وساتي.
دغې ادارې ويلي، چي پر پاکستان ئې ږغ کړی، ترڅو د ترهګرو د مالي سرچينو د وچولو او د هغوی سره د مرسته کونکو پرضد ګامونه اوچت کړي.
د پاکستان په تړاو د يادي ادارې غونډه د چهارشنبې په ورځ د فرانسې په پلازمېنه پاريس کي وسول او پکي د ترهګرو د مالي ملاتړ پر ضد د پاکستان د اقداماتو ارزونه وسوه.
ددغې غونډي ګډونوالو وويل، چي تر دا مهاله پاکستان د ترهګرو د مالي ملاتړ پر ضد جدي اقدامات نه دي اخيستي، خو د وروستي اخطار په توګه ئې د را روان کال تر فبروروي پوري وخت ورکړی چي په دې هکله عملي ګامونه پورته کړي.
د ترهګرو د مالي سرچينو د وچولو اداره وايي، چي که په دغه موده کي پاکستان د ترهګرو د مالي ملاتړ څخه لاس وا نه خيستی او پر ضد ئې ګامونه اوچت نه کړل، نو په نړيوال تور ليست کي به شامل سي.
پاکستان په نړيواله کچه د ترهګرو ملاتړی هيواد بلل کېږي، چي سيمي او نړۍ ته ئې جدي ګواښ پېښ کړی دی.
