په بهر کې یو شمېر هغه کمپنۍ چې افغان سوداګر ورڅخه سوداګریز توکي پېري، د راکړې ورکړې په صورت کې ورسره دوکه کوي.
د هېواد یو قومي مشر او سوداګر مطیع الله مطیع وایي چې څه موده مخکې یې د ( Witchayaporn chayaman paper LTD) په نامه له یوې ټایلندۍ کمپنۍ سره د توکو د پېر قرارداد درلود چې له شاوخوا شل زره امریکایي ډالرو تر استولو وروسته یې د نوموړي ټول ادرسونه بلاک کړي دي او توکي یې نه دي ترلاسه کړي.
مطیع چې د سوداګرۍ خونې غړیتوب لري، له دې سره سره یې له سوداګرۍ خونې، بهرنیو چارو وزارت او په هند کې د افغانستان له سفارت څخه مرسته غوښتې چې تر دې دمه یې چا لاسنیوی نه دی کړی. نوموړی ټایلنډ هېواد ته تللی او او د یاد هېواد دولت ځکه ورسره مرسته نه کوي چې افغان حکومت یې ورته یادونه نه ده کړې.
هغه تر دې مخکې په هند کې د افغانستان سفارت ته د دې لانجې د حل په موخه یو لیک ورکړی و چې سفارت یې د لیک په ټاپه کولو کې ناغیړي کړې وه.
مطیع له افغان دولت او د سوداګرۍ خونې غوښتنه کړې ده چې په دې برخه کې ورسره مرسته وکړي او له یادې کمپنۍ سره یې لانجه ختمه کړي.