لراوبر ویب پاڼه لراوبر يو افغان – تازه خبرونه
د هرات ولايت روغتيايي مسؤولين وايي، چي په دغه ولايت کي د کرونا بله مثبته پېښه تاييد سوې ده. په دې سره په افغانستان کي ددې په دې وايرس د اخته کسانو شمېر ۲۲ ته رسېدلی دی.
بل خوا د افغانستان د کډوالو چارو وزارت وايي، چي په ايران کي د کرونا ناروغي له امله ۱۰ تنه افغانان مړه سوي دي.
د کډوالو چارو وزير سيد حسين عالمي بلخي وايي، چي په ايران کي دغه افغانان د قرنطين په حالت کي مړه سوي او خاورو ته سپارل سوي دي.
ښاغلي بلخي چي نن يې د ولسي جرګې په استماعيه غونډه کي وينا کول وویل، چي په ايران کي په کرونا د اخته افغانانو دقيق شمېر مالوم نه دی.
دا پر داسي مهال ده چي هره ورځ په زرګونو افغان کډوال له ايران څخه افغانستان ته را اوړي.
په پاکستان کي بيا د کرونا وايرس پېښي تر ۱۸۰ اوښتي دي.
د امریکا جان هوپکېنز پوهنتون چي په نړۍ کي د کرونا وايرس شمېرې راټولوي، وايي دا وخت کرونا وايرس د نړۍ ۱۴۸ هېوادونو ته رسېدلي، ۶۵۱۳ کسان يې مړه کړي دي.
