په ځینو اروپایي هیوادونو کي دا پروسه تر کار لاندي ده او نورو کي به د ټاکنو او تنظیم سازۍ دباصلاحیته کمیسون لخوا په نژدې راتلونکي کښي پیلیږي او باور دی چي په ښه توګه به بشپړیږي.

پي ټي ایم په اروپا کي د منظم کیدو په حال کي دی.
د غړیتوب او تنظیم چاري په سویډن، بلجیم او فرانسه کي بشپړي سوي دي او نور به هم پراخیږي.

دلته به اوس تر پخوا په منظمه توګه د غورځنګ د مرکز سره همږغي او همکاري پیلېږي.
تاسو که د اروپا اوسیدونکي یاست یا دلته ملي ګټو ته ژمن خلک پیژنئ نو ویې هڅوئ چي پخپلو هیوادونو کي د ټاکنو کمیسون یا پي ټي ایم د فعاله غړو سره خبري وکړي، د غورځنګ ملګري سي او د خپلو خلکو د انساني او مدني حقونو د ژغورني او دفاع په دې سوله ایز او بشردوسته کاروان کي خپل ملي، انساني او اخلاقي مسولیت پر ځای کړي.

پي ټي ایم په دې کلک باور لري چي #لراوبریوافغان دی او ددې لویي جغرافیې د هري سیمي نا امنه کیدل د ټولي جغرافیې د نا امنۍ او بدبختۍ معنا لري چي تاوان به یې افغان ته رسیږي خو ګټه یې پنجاب او هغو هیوادونو ته رسیږي چي زموږ سره د دوستۍ سابقه نلري.

د #PTM مشرتابه او غړي که په سهیلي پښتونخوا، ږوب، سوات، باجوړ او وزیرستانونو کي د پنجابي پوځ د ظلمونو او یوار بیا د نا امنیو د پیلېدو خلاف دي همداسي د افغان ښځینه محصلینو سره د زښت چلند، د شپږم ټولګۍ پورته نجونو د تعلیم بندیز او د پخواني افغان نظامیانو چي عمومي عفوه ورته سوې وه، د تعقیب او هدف ګرځولو د ژر تر ژره مخنیوي غوښتونکی دي او دا ټول د معاصري نړۍ د تهذیب او نړیوالو بشري حقونو څخه سرغړونه ګڼي.