دافغانستان يوازينى مجاهد د پېښور د سيمې د يو ديني عالم ارواښاد مولانا راحت ګل په اړوندپه اردو ژبه د ليکل شوي يو کتاب  نوم دى چې د مخ کتنې غونډه يې د پېښور په پرېس کلب کې وشوه .مولانا راحت ګل چې د پېښور په راحت اباد کې يې ديوې لويې مدرسې بنسټ ايښى و، د افغان جهاد پر مهال يې د جهادي مشرانو سره نږدې اړيکې درلودلې او پخپله هم د روسيې ځواکونو پرضد په افغانستان کې جنګيدلى دى .په کتاب کې د نوموړي مولانا په اړونداو د افغانستان د جهاد په اړوند مستند معلومات ځاى پر ځاى شوي دي .

د کتاب د مخ کتنې غونډې ته مولانا سناتور ګل نصيب خان ،مولانا جليل جان ،د کتاب مولف مولانا سيدالعارفين اود سيمي پيژندل شوي ليکوال او کارپوه پريشان خټک ويناوې وکړې .وينا والو په خپلو ويناووکې دافغانستان جهاد، د پاکستان او ډېرو نورو هيوادونو لپاره يو ژغورونکى ګام وباله ، ددوى په اند که هغه مهال په افغانستان کې د شوروي لښکرو مخه نيول شوې نه واى نو هغوى يوازې په افغانستان بسنه نه کوله د ډېرو نورو هيوادونو دلاندې کولو هوډ يې لرلو .
دکتاب ليکوال او د مولانا راحت ګل زوى مولانا سيدالعارفين  چې دپېښور په راحت اباد کې د اسلامي علومو د مرکزمهتمم يا مسئول هم دى   وويل چې دامهال په افغانستان کې د مخالفو سره چې د جرګه ګۍ د غوښتنو په اساس د مذاکراتوخبره کيږي دوى يې ننګه کوي .

 

مولانا سيدالعارفين وايي دوى پخپله ددواړو لوريو تر منځ د جرګه کيدو ليواله دي ، او دوى د جنګيدونکو ډلو په منځ کې د خپل نفوس په استعمالولو د شخړې په هوارۍ کې خپل رول لوبولى شي .
پروفيسر پريشان خټک هم وايي چې د امن د پاکستان د غاړې مشر اويس احمد غني او د هغه افغان انډول ډاکټر عبدالله بايد داسې لس کسان د مخالفو سره د خبرو د پاره وټاکي چې ديني عالمان اود مخالف لوري د باور وړ وي .
مولانا راحت ګل دافغان جهاد دبري نه پس کله چې د جهادي ډلو ترمنځ اختلافات پيدا شول ډېر ځلي د جرګه مار او د منځه ګړي رول لوبولى دى او هم يې دمجاهدينو ا وطالبانو ترمنځ د سولې هڅې کړي دي ، د ځينو په اند اوس هم دهغه د زوى له خوا دا اعلان چې د سولې  په پروسه کې دافغانستان او پاکستان د حکومتونو سره مرسته کوي مثبتې پايلي مخې ته رلوړلى شي .