نامعلومو د كندهار ښار د يوه ښوونځي پر زده كوونو تېزاب پاشلي او بلي خواته د ښار په زړه كي يوې درنې چاودني درې كسه وژلي او د څلوېښتو په شاوخوا كي ټپيان كړي دي.
د كندهار د پوهني رياست فرهنګي مسئول علاءالدين رفيقي وايي نامعلومو كسانو د ميرويس مېني د نازو آنا ليسې د ۱۴ نجونو پر مخونو تېزاب پاشلي دي.

د نازو آنا ليسې يوې زده كوونكي چي د دې او خور پر مخ يې تېزاب پاشل سوي وه، د آزادۍ راډيو ته وويل سهار چي ښوونځي ته تلل په لاره كي ورته پر موټرسايكل ناست وسله وال ودرېدل او د دې او ملګرو پر مخ يې تېزاب ور وپاژل.
 د ميرويس روغتون د يوه ډاكټر په وينا ځيني نجوني يې تر درملني وروسته رخصت كړي خو د څو تنو روغتيايي حالت د اندېښنې وړ دئ.
د نجونو پر مخ د تېزاب پاشلو د پېښي مسئوليت تر اوسه چا پر غاړه نه دئ اخيستئ خو د كندهار ولايتي چارواكي يې د تل په څېر پړه د وسله والو مخالفانو پر غاړه ور اچوي.
بلي خواته د ښار په زړه كي يوې درنې چاودني چي ملي امنيت رياست، ولايتي شورا او سوداګرۍ خوني ته نيژدې رامنځته سوې درې تنه وژلي او د ډاكټرانو په وينا شاوخوا څلوېښت كسان يې ټپيان كړي دي.
عيني شاهدان وايي پېښه نن غرمه مهال د يوه موټر بم د چاودني له امله رامنځته سوه، چي تر څو كيلومتره شاوخوا پرتو ودانيو دروازې او كړكۍ يې له بېخه كښلي دي.

 

وېډيو : اشنا ټلوېزيون