نه ،بلکي له ولسه ددفاع ولسي ځواک جوړيږي

په دې وروستيو کې داسې خبرونه خپاره شول ، چې امريکايان غواړي په ميدان وردګو ولايت کې قومي ملېشې ځاى پرځاى کړي ، خو  د ترلاسه شويو معلوماتو له مخي  دا قومي ملېشې نه، بلکې د ولسي دفاع  ولسي ځواک دى ، چې ددې ولايت د مشرانو په خوښه، ملاتړ ، مرسته د همدې ولايت له وګړيو جوړيږي .

څو ورحې وړاندې نيويارک ټايمز او يوشمېر نورو کورنيو او بهرنيو رسينو پرته له دې چې د ولس  ددفاع د ولسي ځواک او قومي مليشو ترمنځ توپير وکړي  په غلطۍ سره يې ليکلي وو، چې په وردگو قومي مليشه ځاى پر ځاى کيږي .

دا ولسي ځواک به تر هغه پورې  په دې ولايت کې له خپل ولس څخه دفاع کوي او د بيارغونې له بهير سره به مرستندويه وي ، چې ترڅو په دې ولايت کې د امنيتي ځواکونو د کموالي ستونزه نه وي هواره شوې  او هغه مهال چې د ملي اردو او ملي پوليسو د کموالي ستونزه حل شوه ، نو دغه ولسي ځواک ، چې پوره نظامي روزنه به يې ليدلې وي، بيا په خپله خوښه د ملي اردو او ملي پوليسو ليکو ته ځي او هلته به جذبيږي .

دغه ولسي ځواک ته د ملېشې د کلمې کارول يو ناسم پوهاوى  دى ، او دا ولسي ځواک  به د نامسوولو وسلوالو قوماندانانو د وسلوالو په څېر نه وي ، بلکې ددولت په خوښه به په دولتي چوکاټ کې  فعاليت کوي .

دا ځواک به د ميدان وردګو ولايت د ټولو قومي مشرانو ، جهادي قوماندانانو، علماوو او مخورو په خوښه له هغوي سره په مشوره او ددوي له وروستۍ پرېکړې وروسته جوړيږي ، يواځې او يواځې به دلته د هغو ورانکارو فعاليتونو مخه نيسي ، چې ددې ولايت ولس ور سره مخ دى .

 دغه ولسي ځواک به  ددوستم ، مالک ،عصمت مسلم او ځينو نورو خپلسرو ملېشو په  څېر نه وي او نه به له دغسې لنډغرو جوړيږي ، دغه ولسي ځواک به د وردگو ولايت د ولس خپل ځواک وي او ددې ولايت د ګټو لپاره به کار کوي .

د ميدان وردګو ولايت اوس يوې جدي پاملرنې ته اړتيا لري ، ځکه چې په دې ولايت کې  تښتونو، خپلسرو وسلوالو ، غلاوو  او بريدونو  د عام ولس ژوند له ګواښ سره مخ کړى دى  .

ددې ولايت په زرګونو لوستي ځوانان د نالوستو ترڅنگ بې کاره گرځي او د يوې مړۍ ډوډۍ د پيداکېدو لپاره هرې خواته لاس اچوي، داځکه چې په ددې ولايت کې پورته ذکر شويو ناخوالو د بيارغونې کارونه له ځنډ سره مخ کړي او بې کارۍ ته يې ښه زمينه برابره کړې ده .

هر کال د ٣٠٠٠ تنو په شاوخوا کې لوستي  ځوانان د هيودا لوړو تحصلي موسسو ته امتحان ورکوي او بياد مور او ميرې د سلوک له امله له دغو  ځوانانو يواځې څوتنه دغو پوهتونونو ته جذبيږي او نور يې ، بې سرنوشته پاتي کيږي ، چې له دې سره له ځوانانو څخه د ژوند کولو لور ورک دى ، په داسې حال کي چې له  لوستو ځوانانو په دي ولايت کې د ژوند لورى ورک وي ، نو د نالوستو ځوانانو ، سين ږيرو ، تنکيو ځوانانو ، ماشومانو او ښحو به څه حال او څه ژوند وي .

 پوښتنه دلته ده، چې که ولسي ځواک په دې ولايت کې جوړ نشي ، افغاني ځواک لږ وي ، بهرنيان  شتون ونلري  او پوز تړلي ناپېژانده وسلوال په يوه او بل نامه ددې ولايت په کليو او بانډو خلک وژني ، تښتوي يې ، مال يې ترې غلاکوي ،ښوونکى يې وژني ، ښوونځي يې  ويجاړوي ، پول يې نړوي ، سړک يې ورانوي ، د بريښنا پايه او مزي نه پردي ، نو اخر به ددې ولس خلک څنګه  او چېرې ته  ژوند کوي او څومره زغم به ولري چې دا هر څه په بې وسۍ او رڼو سترګو و زغمي ، دغه ولس اخر اړه ده ، چې د خپل ژوند د بقا لپاره  کار په لاس شي ، ځکه پټه خوله پاتې کېدل ددوى د تباهۍ لامل   ګرځي .

په دې ولايت کې که ولسي ځواک جوړيږي او که بهرنيان مېشت کيږي، ټول مسووليت يې د هغو پوز تړليو ناپېژانده او ورانکارو وسلوالو پر غاړه ده ، چې دغه له امن  او زده کړې ډک ولايت  يې ناامنه کړى او د پرديو په لارښوونه يې په دې ولايت کې په يادو شويو ځورونکيو کړنو لاس پورې کړى .
دا ټولو ته جوته ده چې هيڅ بهرنى ځواک چې په هر کچه وي ، د افغانستان ستونزه نشي حل کولى ، نو ښه دا ده چې افغانان په خپله که هغه دولت او که ددولت مخالفين دي  ددې هيواد موجوده ستونزه حل کړي  او نور پرېنږدي چې بهرنيان د ناامنو په پلمه دغه هېواد ته خپل  نورسرتېري راولېږي ، ددغو سرتېرو پر ځاى دى له مخالفينو سره خبرې وشي ، ملي اردو ، ملي پوليس  او د اړتيا پر مهال دى ولسي ځواک پياوړى شي .