ورځپاڼو ته کتنه
د ویسا خپلواکې ورځپاڼې د خپل لومړي مخ په غټ سرلیک کې د نیویارک ټایمز ورځپاڼې د یو رپورټ په استناد لیکلي دي چې امریکا باید په پاکستان کې د طالبانو په پلویانو حمله وکړي.
ورځپاڼې په یو بل مطلب کې د پاکستان روانې پیښې او له هند سره د هغې د اړیکو خړیدل څیړلي او لیکلي دي چې دې مسلې د سیمې امنیت اغیزمن کړې دې.
په ورځپاڼه کې د اشرف غني احمدزي په وروستیو څرګندونو هم تبصره کړې چې پکې په حکومت انتقادونه شوي او هغه يې کلیشه يې توصیف کړیدي.
د هیواد دولتي ورځپاڼې پخپله سرمقاله کې په روان ژمي کې د بیوزلو خلکو ستونزې څیړلې او پدې ترڅ کې يې د ترهګرو حملو ته کتنه کړې چې د ورځپاڼې په وینا د خلکو ستونزې يې لاپسې زیاتې کړیدي.
ورخپاڼې د خپل لومړي مخ غټ سرلیک له هغو کسانو سره د ولس مشر کرزي لیدنې ته ځانګړې کړې چې د کورنۍ غړي يې د ایتلافي خواکونو په حملو کې وژل شوي.
ورځپاڼې د ښاغلي کرزي په حواله لیکلي دي چې نړیوال ځواکونه دې د ملکي خلکو د سر او مال خوندي کړي.
ورخپاڼې په یو بل څیړنیز مطلب کې د ملي اردو او ملي پولیسو پیاوړتیا د هیواد اساسي ضرورت بللې دې.
د ارادې خپلواکې ورځپاڼې بیا د ملي شورا په تیرو دریو کلونو فعالیتونو تبصره کړې او لیکلي دي ملي شورا د معاملاتو ګرم بازار وو.
ورخپاڼې خپله سرمقاله د ژمي رسیدلو او په ځینو سیمو کې د خوراکي موادو د کمښت مسلې ته ځانګړې کړې او ددې ستونزې د حل غوښتنه يې کړیده.
ورخباڼې په یوه بله تبصره کې په افغانستان کې په نړیوال ماموریت بحث کړې او پوښتلي دي چې ایا لویدیځ په افغانستان کې بریالې وو.
د ملي ارمان نا دولتي ورځپاڼې هم د هند او پاکستان ترمنځ کړکیچ ته په اشارې لیکلي دي چې ددغو دواړو هیوادونو ترمنځ د اړیکو خړیدل په افغانستان کې ځان وژونکې حملې زیاتوي.
ورخپاڼې په یو بل مطلب کې د ملي جبهې فعالیتونه څیړلې او پدې ترڅ کې د جمهوري ریاست د راتلونکو انتخاباتو لپاره ددې جبهې د کاندید مسله هم راغستې ده.
ورخپاڼې په یو بل ځاې کې لیکلي دي چې په افغانستان کې د سولې د ټینګښت لپاره لازمه ده چې د ملیشو له جوړولو نه ډډه وشي او د هغې پر ځاې ملي اردو پیاوړې شي.
د پیمان نا دولتي ورځپاڼې بیا په پاکستان کې د ترورستانو فعالیتونو ته په اشارې د امریکا د سي آې اې د یو پخواني څیړونکي په حواله لیکلي دي چې پاکستان له کلونو کلونو امریکا ته دوکه ورکوي.
ورخپاڼې په افغانستان کې د نړیوالو ځواکونو ماموریت ته په اشارې دا پوښتنه کړې چې په افغانستان کې د جنګ دوام څه معنې لري.
په ورځپاڼه کې د هلمند ولایت د خلکو دا غوښتنه هم راغستل شوې چې ویلي دي چې بهرني ځواکونه دې د نادعلي له ولسوالۍ نه ووځي.
د اصلاح او انیس دولتي ورځپاڼو هم د افغانستان او سیمې په روانو حالاتو او پیښو خبرونه او تبصرې خپرې کړې دي.
انیس پخپله سرمقاله کې د هند او پاکستان ترمنځ روان کړکیچ ته په اشارې دا پوښتنه کړې چې ایا دا دواړه هیوادونه به په جنګ کې ښکیل شي.
خو اصلاح بیا لیکلي دي چې ښايې نړیواله ټولنه په افغانستان کې د جنګ د اوږدیدو پر ځاې د سولې په برخه کې هڅې ګړندۍ کړي.
د هشت صبح نا دولتي ورځپاڼې د خپل لومړي مخ په غټ سرلیک د خبریالانو په وړاندې د تاوتریخوالي مسله راغستې او لیکلي دي چې د خبریالانو په وړاندې زیاتره تاوتریخوالې د دولت لخوا کیږي.
ورځپاڼې په همدې مخ کې یو انځور هم خپور کړې چې پکې یو خبریال خپله خوله په زنځیر تړلې ده.
هشت صبح هم خپله سرمقاله د هند او پاکستان ترمنځ روان کړکیچ ته ځانګړې کړې چې د ورځپاڼې په وینا د جنګ تر حده رسیدلې.
ورځپاڼې په یو بل مطلب کې په کابل ښار د توغندیو د حملو مسله هم راغستې او لیکلي دي چې تاریخ بیا تکراریږي.