نږدي يو کال مخکي د اسټراليا هېواد د جنراټورانو د يوي فابريکي يوه استازي، چي ښاغلى غفار نعيمي نومېدى او په خټه افغان و، پلازمېني کابل ته تشريف راوړ. د اوبو او انرژۍ وزير ښاغلي اسماعيل خان، د پارلمان د دوو کندهاري استازو (يو زه پخپله وم او يو هم شهيد حبيب الله جان و) او د کندهار ولايت د پخواني والي (اسدالله خالد) په موجوديت کي له ښاغلي نعيمي سره يو تړون لاسليک کړ، چي د (٧) اوو ميليونو آمريکايي ډالرو په بدل کي به کندهار ښار ته (٢٣) درويشت جنراټوران راوړي .

د دغه تړون پر مهال د کندهار پخواني والي اسدالله خالد وويل، چي له يادو شوو اوو ميليونو آمريکايي ډالرو څخه به (٣،٥) دري نيم ميليونه ډالر زه د بيارغوني له پيسو څخه ورکړم، چي زما سره نقدي پرتي دي، او (٣،٥) دري نيم ميليونه ډالر نوري پيسي د جمهور رئيس په ځانګړي امر د ماليي وزارت له حساب څخه ورته منظوري کړل شوې .

کله چي زموږ په موجوديت کي دا تړون لاسليک شو، نو تر دي وروسته اسدالله خالد د کندهار له خلکو سره د کندهار ټلوېزيون پر پرده د زېري په ډول ژمنه وکړه، چي په راتلونکو څو اوونيو کي به کندهار ته نوي جنراټوران راورسېږي او له دي سره به کندهار ښار د دوه دېرش مېګاواټه برېښنا خاوند شي. ده وويل، چي له دغه دوه دېرش مېګاواټه برېښنا څخه به دوه ويشت مېګاواټه برېښنا له همدغو نوو جنراټورانو څخه توليدېږي او لس مېګاواټه نوره برېښنا به له کجکي بند څخه راځي، چي ټولټال دوه دېرش مېګاواټه برېښنا کېږي .

د کندهار ښار خلک د ټلوېزيون له لاري د دي خبر په اورېدو سره ډېر زيات خوشحاله شول. ځکه هغوى د ملي ټلوېزيون له لاري هم وليدل، چي د کندهار ښار د برېښنا جوړولو تړون د پارلمان د وکيلانو، د وخت د والي او د برېښنا او انرژۍ وزير تر منځ لاسليک شو.

څو اوونۍ نه؛ بلکي څو مياشتي تېري شوې، مګر د کندهار ښار برېښنا ورکه شوه. کله چي مي په ډوبۍ مي له غفار نعيمي څخه پوښتنه وکړه، چي جنراټوران څه شول؟ هغه په ځواب کي راته وويل، چي د کندهار ولايت له خوا تر اوسه يوازي څوارلس لکه ډالر رالېږل شوي، او يوويشت لکه ډالر يي پاتي دي. هغه راته وويل، چي موږ کندهار ته تر اوسه يوازي د څوارلس لکه ډالرو معادل ماشينان ورلېږلي دي .

دا هغه مهال و، چي اسدالله خالد نوى له کندهار څخه تبديل شو او د هغه له تبديلېدو سره  سم پيسي هم ورکي شوې. اوس پوښتنه دا پيدا کېږي، چي دا پيسي څه شوې؟ په داسي حال کي چي هېڅوک هم دا پوښتنه نه ځوابوي!…

په دي موضوع کي مي د ولسمشر له ورور ښاغلي محمود کرزي او د ماليي له پخواني وزير ښاغلي انورالحق احدي څخه پوښتنه وکړه. هغوى هم د ورکو شويو پيسو په اړه معلومات نه درلودل او ويل يي چي پيسي (بېځايه) شوي دي .

تر هغه وروسته مي د بېځايه شويو پيسو په اړه په کندهار کي پلټني وکړې. تر پلټنو وروسته جوته شوه، چي پيسي د کندهار ولايت په اداري چوکاټ کي د اسدالله خالد په امر او د نورو چارواکو په مرسته د جعلي اسنادو په وسيله ايستل شوي وې. د دي لپاره چي موضوع څه ناڅه روښانه شوي وي، نو بايد ووايو چي د بيارغوني لپاره دوه ډوله پيسي دي، يو هغه دي چي د اسنادو له مخي ولايت ته ورکول کېږي، خو ځيني داسي هم شته چي مستقيما خپله والي ته ورکول کېږي او والي يي په خپله مصرفوي، دا هغه پيسي دي چي د اسنادو له مخي نه مصرفېږي. په دغو پيسو کي يوه اندازه ونډه د ولايت اداري مسوولينو ته هم ورکړل شوي ده؛ خو زياته اندازه يي تبديل شوي والي (اسدالله خالد)، چي د برېښنا جوړولو تړون يي له اسټراليايي کمپنۍ سره کړى و، له ځان سره وړي دي.

له ښاغلي جمهور رئيس څخه مي هيله دا ده، چي د مهربانۍ له مخي دي د دغو پيسو د تثبيت لپاره يو باصلاحيته هيئت وټاکي او دا موضوع دي وڅېړي .

څو ورځي مخکي ښاغلى اسدالله وفا کندهار ته د کندهار ولايت د اداري چارو د نظارت او تفتيش لپاره راغلى و او د خپل سفر په ترڅ کي يي يوي مهمي موضوع ته اشاره وکړه. هغه دا چي ښاغلي ګل آغا شېرزي د بيارغوني ټولي پيسي په کندهار کي پر بيارغونه لګولي او څرګند ثبوت او بېلګه يي هم په نوموړي ولايت کي د (١٢٨) پروژو تر سره کول دي، چي دا مهال په کندهار کي د هماغو پروژو ښايست کندهار ته يو بېل رنګ ورکړى دى. د ګل آغا پر هغو بيارغونيزو کارونو، چي نوموړي د خپل ولايت پر مهال په کندهار کي تر سره کړي، هېڅوک؛ آن د ده دښمنان هم سترګي نه شي پټولاى. ځکه شېرزى په کندهار کي د ښکلي بيارغوني په ترسره کولو د بيارغوني اتل شو او له همدي امله يي د بيارغوني د اتل په نوم څو مډالونه هم تر لاسه کړل. که تاسي د کندهار ښار او د دي ولايت يو شمېر ولسواليو ته ورشئ او د ګل آغا شېرزي له خوا تر سره شوي د بيارغوني د کارونو ښکلي بېلګي وګورئ، نو هغه مهال به درته معلومه شي، چي ګل آغا شېرزى رښتيا هم د بيارغوني او د هېواد د بياجوړوني په چارو کي سيال نه لري او هغه مډالونه او لقبونه، چي ده ته د بيارغوني په برخه کي ورکول شوي، بېځايه نه دي. مګر کله چي ګل آغا شېرزى له کندهار ولايت څخه ولاړى، د بيارغوني پيسي دوه برابره شوې، خو بيارغونه نه يوازي دا چي دوه برابره نه شوه، بلکي د بيارغوني هغه بهېر لا په ټپه ودرېد، چي د ښاغلي شېرزي له خوا پيل شوى و، چي له بده مرغه دا مهال هم د بيارغوني خوند نشته .

که څه هم د کندهار ولايت د بيارغوني لپاره د اسدالله خالد په وخت کي د ګل آغا شېرزي د وخت په پرتله پيسي دوه برابره وې، خو دا چي ده د کندهار ولايت له بيارغوني سره حساسيت درلود، ځکه يي په کندهار کي بيارغونه بنده کړه. زه د پارلمان د استازي په توګه له ښاغلي وفا صاحب څخه مننه کوم، چي په کندهار کي يي د بيارغوني په نوم د پيسو ټولولو ته د پاى ټکى کښېښود.

زه د خپلي دندي د مسووليت په احساسولو سره خپلو مؤکلينو ته دا وايم، چي ستاسو پيسي د برېښنا په پلمه وړل شوي دي. ما دغه ستونزه ستاسو او د هېواد د لوړپوړو چارواکو تر غوږونو پوري ورسوله او خپل مسووليت مي تر سره کړ.

يوه بله خبره، چي له موضوع څخه دباندي ده، دا ده، چي په دي وروستيو کي له ارګ ماڼۍ څخه ډېري تندي آوازي اورېدل کېږي، چي دا ځل اسدالله خالد پارلمان ته د ټرانسپورټ د وزير په توګه ورپېژندل کېږي . تاسو ټول خبر ياست، چي ټرانسپورټ وزارت يو عايداتي وزارت دئ او په کال کي سل ميليونه آمريکايي ډالر عايد لري. د دي وزارت عوايد د دولت د مصارفو او د دولتي مامورينو د معاشونو لويه برخه برابروي . نو کله چي د کندهار پخوانى والي اسدالله خالد په کندهار کي لا د خپل ولايت پر مهال په اداري او اخلاقي فساد کي ډوب و، بيا دي نو خداى (ج) د دي وزارت پرده کوي!…