د هېواد په کچه په لومړي ځل په ميدان وردګو ولايت کې د ٣٠٨ جوماتونو د جوړولو ، رغولو او تجهيزولو اعلان شو ، چې له دې اعلان سره ددې ولايت اوسېدونکي زيات خوښ او د ياد شوي ولايت د چارواکيو او په ځانګړې توګه ددې ولايت د والي دغه ګام يې وستايه .

د ميدان وردګو والي محمد حليم فدايي دغه اعلان تېره ورځ په ميدان ښار کې په هغه غونډه کې وکړ ، چې ددې ولايت د نږدې پنځه زره اوسېدونکيو په ګډون د ميلاد نبي ( ص ) په مناسبت جوړه شوې وه .

په دې غونډه کې ددې ولايت د ټولو ولسواليو علماوو ، مخورو ، جهادي قوماندانانو ، د ولسي جرګې او ولايتي شورا غړيو ، د ولايت د ټولو ادارو چارواکيو او يو شمېر مېلمنو برخه درلوده .

په غونډه کې  د ميدان وردګو والي  فدايي د حضرت محمد (ص) په سيرت ، اخلاقو او ژوند باندې بشپړه ويناه وکړه او د هغه د ژوند بېلابېل اړخونه يې ګډون والو ته روښانه کړل ، وروسته يې ژمنه وکړه چې ددې ولايت ٣٠٨ جوماتونه به جوړ ، ترميم او تجهيز کړي او او لمونځ کوونکيو ته به هر ډول اسانتياوې برابرې کړي  او په راتلونکي يوه اونۍ کې به ددغو جوماتونو د کار لړۍ په عملي توګه پيل کړي ، چې پنځه سوه زره امريکايي ډالره لګښت پرې راځي .

همدارنګه ددې غونډې په پاى کې  له سلګونو يتيمانو ، کونډو ، معويبينو او نورو اړو
سره مرسته وشوه او ٢٠٠ علماى کرامو ، ١٠٠ د سپورټ لوبغاړو او ٢٠ دولتي چارواکيو ته ستاينليكونه وركړل شول .

 ددې ورځې د درناوي په موخه اته تنه بنديان هم ددې ولايت له محبس څخه خوشې او لازمې توصيې ورته وشوې  او ددې ترڅنګ ددې ولايت د عامې رو غتيا د رياست لخوا د زرتنو ناروغانو د وړيا درملنې ژمنه هم وشوه  او په دې ولايت کې د نيالګيو د ايښودلو لړۍ هم پيل شوه  او د تيکواندو او فوټبال  د دوو لوبډلو لوبغاړو ته د والي فدايي لخوا شل زره افغانۍ د انعام په ډول ورکړل شوې .

 د جوماتونو د جوړېدو له دې اعلان سره د ميدان وردګو والي فدايي ددې ولايت د ولس زړونه وګټل او ولس دغه ګام ته د قدر په سترګه کوي .