په كندهار كې تېر او روان كال خونړي كلونه بلل كيږي چي زياتي چاودني، وژني، بمي حملې او غلچكي بريدونه په كي وسول او دا لړۍ اوس هم روانه ده، چي هيڅ سړى هم ځان خوندي نه احسسوي. د كندهار پر امنيې قوماندانۍ له دوو ځانمرګو بريدونو راپيل كړه، پر ولايتي شورا تر خونړۍ حملې او بيا د ولايت پر مقام ځانمرګي بريدونه چي له دې څخه سړى اټكل كولاى سي چي كندهار ماشا الله څومره باكفايته امنيتي چارواكي لري. څومره قوي استخبارات لري چي ځانمرګي په ښار كي دننه تنظيميږي ښار ته راځي، يا غلچكي بريدكوونكي په ښار كي دننه فعاله دي، د كندهار استخبارات د فيل په غوږ كي بيده دي.
 
په كندهار كي په يوه مياشت كي تر ۲۴ زيات ديني عالمان او ملا امامان ووژل سول، د ولايتي شورا غړې ستاره اڅكزۍ په غلچكي بريد كي ووژل سوه، ازاد خبريال جاوېد احمد يازمي په رڼا ورځ ولايتي شورا او د استخباراتو رياست ته نژدې ووژ سو، د پوهني رئيس، د روغتيا رياست مرستيال دغه راز ځيني نور روغتيايي كاركوونكي په دې وروستيو كي ووژل سول، خو نه يوازي قاتلين ونه نيول سول، بلكي وسلوال دومره باجرئته سول چي ان د ولايت مقام ته دننه ننوځي او حملې كوي.
 
چي د ولايت وداني او امنيه قومانداني په امن كي نه وي د خلكو ژوند به څنګه امن وي، دا دومره پوليس، استخبارات، د ملي اردو ځواكونه او په زرګونو كاناډايان په څه اخته دي؟
 
د تېر ميلادي كال په سپټمبر كي د ښځينه پوليسو مشره ملالۍ كاكړ هم ووژل سوه، دغه راز په ۲۰۰۶م كال كي د كندهار د ښځو چارو رئيسه صفيه عمه جانه هم په وسلوال بريد كي ووژل شوه.
 
كله چي خبريالان د كومي دغه ډول پېښي په اړه له امنيه قوماندان مطيع الله قاطع سره خبري كوي، نه يوازي معلومات نه وركوي، بلكي داسي وضعيت كوي ته وا د دغو پېښو تر شا د خبريالانو لاس دى. د قاطع د چلند په اړه تر دې مخكي هم په مطبوعاتو كي ليكني راغلي دي، چي څومره ښه اخلاق لري ما شا الله.
 
ښايي د كرزي د ادارې دغه ډول بې كفايته كسان په كار وي، هغه كسان چي كار كوي تاسو ته به تجربه سوې وي چي همدې ادارې له يوه ولايت څخه بل او له يوې سيمي څخه بلې هغې ته بدل كړي دي، يا هغه كسان چي واقعاً كار كوي همدې كرزي او كرزيانو پسي اخيستي دي.

كرزي كه بل هر كار كړى، دكندهار دپاره يې لوى خيانت كړى دى، چي دې ولايت ته يي هيڅ پام هم نه دى كړى، په دې هيله چي پاك خداى (ج) د كندهار خلك له روان ناورين څخه وساتي.