لراوبر ویب پاڼه لراوبر يو افغان – تازه خبرونه
د کابل چاپ نننیو ورځپاڼو خپل مطالب او تبصرې ترډېره د ملګرو ملتونو له عمومي اسامبلې څخه د افغانانو هیلو او د اوسني حکومت د کمزوریو په اړه را ولاړو شوو بحثونو ته ځانګړي کړي دي.
اصلاحات:
اصلاحات ورځپاڼې په خپله سرمقاله کې لیکلي چې د ملګرو ملتونو په عمومي اسامبله کې د اجرایي رییس عبدالله عبدالله ګډون د افغانستان لپاره یو فرصت دی.
په سرمقاله کې راغلي چې د داعش حضور په افغانستان کې یو ګواښ دی او د حکومت استازو ته په کار ده چې په دې اړه د مبارزې لپاره سیمه ییزه او نړیواله همکاري را جلب کړي.
سرمقاله لیکونکي ویلي، که نړیواله ټولنه له افغانستان سره د داعش په وړاندې مبارزه کې همکاري ونه کړي؛ افغانستان به بیا د ترهګرو په پټن ځای بدل شي او ګواښ به یې ټولې نړۍ ته متوجه شي.
انیس:
انیس دولتي ورځپاڼې په خپله سرمقاله کې لیکلي؛ هیله ده چې افغان پلاوی د ملګرو ملتونو له عمومي اسامبلې څخه ډک لاس هېواد ته را ستون شي.
په سرمقاله کې راغلي چې د ملګرو ملتونو دغې اویایمه غونډه کې د افغان حکومت په استازیتوب اجرایي رییس عبدالله عبدالله ګډون کوي.
سرمقاله لیکونکي ویلي چې عبدالله عبدالله به د غونډې له ګډونوالو سره د افغانستان پر اقتصادي او امنیتي ستونزو او دغه راز له دې هیواده د ځوانانو د غیر قانوني مسافرتونو په اړه خبرې وکړي.
اطلاعات روز:
اطلاعات روز ورځپاڼې بیا په خپله سرمقاله کې پوښتنه کړې چې ولې په دې وروستیو کې د حکومت د برخه لیک په اړه اوازې زیاتې شوي دي.
په سرمقاله کې راغلي چې په دې ورځو کې د ولسمشر د ناروغۍ او موقت حکومت د رامنځ ته کیدو اوازې ګرمې دي؛ خو ارګ تراوسه د ولسمشر د روغتیا په اړه خلکو ته ډاډ نه دی ورکړی.
د سرمقالې لیکوال ویلي چې دغه ډول اوازې خپله هغه سیاستوال خپروي چې ارګ ته نږدې دي او خلکو ته د راتلونکې په اړه اندیښنې پيدا کوي.
ملي ارمان:
ملي ارمان خپلواکې ورځپاڼې خپلې سرمقالې ته دا سرلیک ورکړی چې عجیبه ده؛ غل او د کور څښتن دواړه شکایت کوي.
په سرمقاله کې راغلي چې حکومت د انتخاباتو د اصلاح لپاره یو کمیسیون جوړ کړ؛ خو د انتخاباتو کمیسیونونه دا کمیسیون غیرقانوني بولي.
د ورځپاڼې په باور، د انتخاباتي شکایتونو کمیسیون مشر ویلي؛ که کمیشنران له دندو لرې کیږي، د درغلیو په اړه به ډیر زیان ولسمشر غني وویني.
