لراوبر ویب پاڼه لراوبر يو افغان – تازه خبرونه
نن د چارشنبې په سهار دوې نيمي بجې پر جنوبي وزيرستان راکټي حمله سوې، چي ښايي درنه مرګ ژوبله يې اړولې وي.
رويټرز آژانس د پاکستاني استخباراتو او ځايي خلګو په حواله خبر ورکوي، چي دغه حمله د بې پيلوټه الوتکو له خوا د ميزايل راکټونو په واسطه ترسره سوې ده.
د پېښي له امله د اوښتي مرګ ژوبلي پوره جزيات نه دي ورکړل سوي، خو راپور د يوه استخباراتي مامور په حواله وايي تر اوسه د اتو جنګياليو خبر ورکړل سوئ دئ.
پرون هم په دې سيمه کي امريکايي بې پيلوټه الوتکو ١٤ وسله وال وژلي وو، چي پنځه يې بهرني اتباع په ګوته سوي وو.
د رويټرز آژانس د يوه پاکستاني مامور په حواله وايي نن سهار شپږ ميزايلونه چي غالباً د بې پيلوټه الوتکو له خوا به فاير سوي وو،په جنوبي وزيرستان کي پر څو هدفونو ولګېدل او اته جنګيالي يې ووژل.
