اراده:

دې خپلواكې ورځپاڼې پخپل لومړي مخ كې په غټو ټكو سره د كاناډا د پارلمان دا پريكړه راخستې، چې په افغانستان كې ددوى پوځي ماموريت به دوام وكړي.

ورځپاڼې وړاندې د كاناډا د صدراعظم د يو وياند په حواله ليكلي،چې د كاناډا حكومت پريكړه كړې، چې په ۲۰۱۱ ميلادي كال كې په افغانستان كې د كاناډايي ځواكونو د ماموريت د پاې ته دسيدو وروسته هم په افغانستان كې خپل يو شمير سرتېري وساتي.

ورځپاڼې پخپله سرمقاله كې د افغانستان روان امنيتي حالات څيړلې او د شتو ستونزو د حل لپاره د پراخو هڅو غوښتنه كړې.

ورځپاڼې په يو جلا مطلب كې په پاكستان كې له افغان كډوالو سره ددغه هيواد د پوليسو چلند ته كتنه كړې او ليكلي، چې د پيښور پوليس افغان كډوال زوروي.

ورځپاڼې يو انځور هم خپور كړې، چې پكې يو افغان كډوال پداسې حال كې ښودل كيږي، چې د پوليسو لخوا نيول شوې.

هيواد:

دې دولتي ورځپاڼې پخپله سرمقاله كې بيا هم د انتخاباتو د وروستيو نتجايو د ژر اعلانولو غوښتنه كړې او ليكلي، چې د نتايجو په اعلان كې ځنډ د خلكو د ژوندانه ټول اړخونه اغيزمن كړي.

ورځپاڼې په يو جلا مطلب كې د انتخاباتو او د ملګرو ملتونو د ځانګړي استازې په اړه د ولسمشر كرزي پرونۍ څرګندونې راخستي او ليكلي، چې كا ايده د افغانستان په باب ښه نيت لري، خو له افغانستان څخه بهريو شمير كړۍ په انتخاباتو كې لاس وهنه كوي.

ورځپاڼې په يو بل ځاې كې د كاايده د وروستيو څرګندونو په استناد ليكلي، چې د ده پخواني مرستيال ګالبريټ، چې د تيلو نړيوال غل دې په انتخاباتو كې د درغليو هڅه كوله.

ويسا:

دې خپلواكې ورځپاڼې بيا د خپل لومړي مخ په سر كې ليكلي، چې د انتخاباتې شكايتونو كمسيون او امريكايانو ترمنځ پټې ناستې كيږي.

ورځپاڼې ددې مطلب په دوام كې ليكلي، چې د انتخاباتې شكايتونو بهرني غړي له مشكوكو امريكايي كسانو سره د شپې لخوا په پټو غونډو كې د انتخاباتو په اړه پريكړې كوي او ددغه كمسيون افغاني غړي له ټولو مهمو او پريكړو ناخبره ساتل كيږي.

ورځپاڼې د خپل لومړي مخ غټ سرليك د افغانستان د شمالي سيمو د امنيتي ستونزو په اړه د ولسمشر كرزي پرونيو څرګندونو ته ځانګړې او ليكلي، چې اوس پدې مسالې غور روان دې، چې ايا د شمال او ختيځ نا امنۍ د همدې هيلي كاپټرونو په وسيله د وسلوالو په ليږلو تړاو لري.

د ورځپاڼې په سرمقاله كې د راتلونكې افغان كابينې د وړتياو په څرنګوالي تبصره كړې او پدې ترڅ كې ځينې ځانګړې سپارښتنې كړي.

افغانستان ټايمز:

دې انګلسي ژبې خپلواكې ورځپاڼې پخپله سرمقاله كې په پاكستان كې وروستۍ ځان وژونكې حملې څيړلي او ليكلي، چې دغو حملو دا ثابته كړه، چې طالبان د بيت اله محسود د ځاې ناستي تر مشرۍ لاندې بيا منظم شويدي.

ورځپاڼې په يو جلا څيړنيز مطلب كې په افغانستان كې د بهرنيو ځواكونو د زياتولو په مسالې تبصره كړې او دا اقدام يى د ځينو دلايلو له مخې ناسم بللې.

ورځپاڼې پخپل ننني كارټون كې كيدونكې ځان وژونكې حملې انځور كړي او پكې دا ښودل شوې، چې ځان وژونكې هڅول كيږي، چې د خلكو په منځ كې چاودنې وكړي.

اصلاح او انيس:

دې دولتي ورځپاڼو هم په بيلابيلو مطالبو كې د افغانستان او سيمې روان حالات څيړلې دي.

انيس پخپله سرمقاله كې د ملګرو ملتونو په وروستيو څرګندونو تبصره كړې او ليكلي، چې كا ايده د انتخاباتو په اړه ټول ابهامات روښانه كړل.

خو اصلاح بيا پخپله سرمقاله كې ليكلي، چې د انتخاباتو د وروستيو نتايجو په اعلان كې رامنځ ته شوي ځنډ په هيواد كې د سياسي بې باورى او اقتصادي ستونزو سبب ګرځيدلې.

راه نجات:

دې نادولتي ورځپاڼې په يو مطلب كې د افغانستان له روانو حالاتو سره د اوباما د حكومت چلند څيړلې او ليكلي، چې د اوباما د ادارې په تيرو اتو مياشتو كې په افغانستان كې بدلونونه منفي وو.

ورځپاڼې په يو بل مطلب كې په افغانستان كې د بهرنيو ځواكونو لګښونه څيړلي او ليكلي، چې په افغانستان كې د هر بهرني سرتيري كلنې لګښت له يو نيم لكو پونډو نه اوړي.

ورځپاڼې پخپله سرمقاله كې هغه ستونزې رابرسيره كړي، چې په ژمي كې د هيواد د بيلابيلو سيمو خلك ورسره لاس او ګريوان وي.

ورځپاڼې وړاندې دولتي چارواكو ته دا سپارښتنه كړې، چې د غفلت له خوبه دې پورته شي او مخكې له دې، چې خلك يو ځلې بيا په راروان ژمي كې له سختو ستونزو سره مخ شي لاس په كار شي.