لراوبر ویب پاڼه لراوبر يو افغان – تازه خبرونه
بيا زما جانان هېواد جنګونو کې ياديږي
بيا مې مېړنی ټبر ننګونو کې ياديږي
هغه اريانا بلخ، ګندهارا زما د نيکونو
دا د اوستا په سرودونو کې ياديږي
هغه راهيبان د غور چې ولاړل فلسطين ته
ځکه د بيبل په اهنګونو کې ياديږي
هغه د سره سيند (جيحون) د غاړې مست شمال
دا چې د قران په اياتونو کې ياديږي
دا خو سپين تمن زردشت روښان لکه د لمر دی
ځکه د جهان په کتابونو کې ياديږي
ها زموږد ويدي د سړيتوب ښکلې سندرې
دا د اباسين د زړه اهونو کې ياديږي
