لراوبر ویب پاڼه لراوبر يو افغان – تازه خبرونه
ځانګړي محکمې تر خپلو څېړنو وروسته ٦٢ داسي وکيلان بريالي اعلان کړل چي وايي په درغليو يې ولسي جرګې ته د تګ مخنيوى سوى وو.
د پارلماني ټاکنو په باب د ځانګړي محکمې مشر صديق الله حقيق د افغانستان د ٢٧ ولايتونو په باب ترسره سوي څېړني نن د پنجشنبې په ورځ اعلان کړې چي په هر ولايت کي له يوه څخه تر څلورو پوري وکيلان پکښي رد او بدل سوي دي.
د آزادۍ راډيو راپور وايي زابل او بادغيس هغه ولايتونه دي چي اوسني ټول وکيلان يې ناکام بلل سوي او پر ځاى به يې نور کسان پارلمان ته ولاړ سي.
د ځانګړي محکمې نتايج وايي د ولسي جرګې اوسنى مشر عبدالروف ابراهيمي چي د تخار وکيل دئ او دوهم مرستيال يې احمدبهزاد چي له هرات څخه تللى دئ، هم په درغليو ولسي جرګې ته ننوتلي وو.
د کابل ولايت څخه بيدار ځاځى او جميل کرزى د پخوانۍ ولسي جرګې غړي وو، چي اوس د ځانګړي محکمې له خوا کامياب بلل سوي دي.
ځانګړې محکمه وايي د انتخاباتو کمېسون د وکيلانو پر حق تېرى کړى وو او يو داسي وکيل يې موندلى چي د انتخاباتو کمېسون صفر ورته ايښى وو، خو دوى د څېړنو پر مهال د هماغه وکيل ٢٠٠٠٠ رايي حساب کړې.
د غزني له ولايت څخه داود سلطانزوى هغه وکيل بلل سوى چي کمېسون ناکام کړى وو، خو نوموړي تر ١٠٠٠٠ ډېري رايي ترلاسه کړي وې.
بلي خوا ته د اوسنۍ جرګې غړو چي ښايي له پارلمان څخه و ايستل سي نن په يوه فوق العاده غونډه کي د افغانستان لوى څارنوال محمداسحق الکو سلب اعتماد کړ، خو د ستري محکمې د پرېکړي په باب يې تر اوسه نظر نه دئ څرګند کړى.
د آزادۍ راډيو راپور وايي د ځانګړي محکمې د نتايجو داعلان په غونډه کي يوازي معترض کانديدان حاضر وو، هغوى ټول د ځانګړي محکمې له پرېکړي خوشحاله وو او هغه کسان چي تر څېړنو وروسته هم کامياب نه ووبلل سوي، برياليو وکيلانو ته يې مبارکۍ ورکړې او خوشحالي يې وښوده چي حق و حقدار ته ورسېدئ.
همدا راز ځانګړي محکمې ويلي چي که د دوى پر څېړنو بيا هم ځيني وکيلان شک لري، دوى حاضر دي چي عريضې يې ومني.
